Учорашнія школьнікі прыязджаюць з рэгіёнаў і засяляюцца ў сталічныя хостэлы за 30 рублёў за суткі, каб падаць дакументы на прастаўленне апастылю на свае атэстаты, піша Tochka.by.
Адзінаццацікласнікі атрымалі атэстаты 14 чэрвеня, шэсць дзён таму. Здавалася б, можна выдыхнуць, бо ўсе ЦЭ і ЦТ ужо ззаду. Але не ўсё так проста.
Выпускнікі, якія вырашылі паступаць не ў беларускія ВНУ, а выпрабаваць свае сілы за мяжой, мусяць прайсці праз дадатковую працэдуру — легалізацыю ўласнага дакумента адукацыі.
Калі абраная краіна, дзе плануецца навучанне, уваходзіць у Гаагскую канвенцыю, на атэстат прастаўляюць апастыль. Займаюцца гэтым у Дэпартаменце кантролю якасці адукацыі Мінадукацыі.
Менавіта пад яго будынкам ужо некалькі чэрвеньскіх дзён стаіць доўгая чарга з ахвочых легалізаваць дакумент адукацыі.
Як паставіць апастыль
Сітуацыя з легалізацыяй атэстатаў хутка мяняецца, нюансы і асаблівасці працэдуры карэктуюцца літаральна на вачах.
Так, першапачаткова ўсе ахвочыя запісваліся ў неафіцыйную чаргу. Спіс вялі ў сшытку, дзе кожнаму прысвойвалі парадкавы нумар, у адпаведнасці з якім людзі і падаваліся на апастыль.
Нюансы абмяркоўвалі ў створаных чатах у мэсэнджарах. Праўда, інфармацыя пра іх не надта разышлася. Таму некаторыя ў пятніцу, 14 чэрвеня, адстойвалі жывую чаргу без папярэдняга запісу, а даведаўшыся, што ёсць нейкі парадак, моцна нерваваліся.
Ужо ў аўторак, 18 чэрвеня, Мінадукацыі абвясціла пра змену правілаў прастаўлення апастылю з 1 ліпеня. Так, планавалі ўвесці папярэдні запіс у самім Дэпартаменце, а таксама прымаць дакументы і выдаваць ужо аформленыя цягам аднаго працоўнага дня.
Аднак да змены правілаў у падпарадкаваным Міністэрству ведамстве прыступілі ўжо на наступныя суткі.
Так, прыём дакументаў на апастыль з 20 чэрвеня будзе праходзіць выключна паводле папярэдняга запісу, які вядзе сам Дэпартамент.
Такім чынам, у сераду, 19 чэрвеня, чэргаў у беларусаў стала дзве: «у сшытку» для падачы дакументаў і «па талон» з указаннем даты, калі можна прынесці атэстат на легалізацыю.
Арандавала хостэл дзеля апастылю
Міхаіл (імя змененае на просьбу героя) прыехаў з Брэста. Да будынка дэпартамента хлопец прыехаў адразу з цягніка. Пра чат у мэсэнджары загадзя не ведаў. Спасылку на яго атрымаў выпадкова ад сваякоў у дзень паездкі.
Таму навіна пра дзве чэргі Міхаіла не збянтэжыла: адразу стаў па талон.
— Адбываецца так: той, хто быў запісаны ў сшытак, падае дакументы сёння, а тыя, хто крыху далей (у пераліку. — Заўв. рэд.), цяпер стаяць у чарзе, каб атрымаць талон, — растлумачыў хлопец.
У чарзе «ад Дэпартамента» Міхаіл таміўся прыкладна паўтары гадзіны. На момант размовы хлопец быў бліжэй да ўваходу ў будынак, чым да канца «шарэнгі».
Як пазней растлумачылі ў чаце, талоны выдавалі з разліку прыкладна 80−90 чалавек на падачу ў адзін дзень. Хто ішоў пазней за гэтую адзнаку, атрымліваў запіс на наступныя даты. Так, у 15.20 адзначалі, што талоны выдаюць на 26 чэрвеня.
Дні ў чаканні апастылю Міхаіл прабавіць у гасцях у сваякоў.
У Ганны сітуацыя складанейшая. Падчас нашай гутаркі яна спрабавала падаць дакументы на легалізацыю ўжо трэці дзень. Дзеля юрыдычнай працэдуры дзяўчына прыехала з Гродна. Жыве ў сталічным хостэле, за суткі плаціць 30 рублёў.
— Сваякі запісалі мяне (у сшытак. — Заўв. рэд.) на падачу яшчэ на мінулым тыдні. І я была аптымістычна настроеная, думала, што прымуць хутка. Спадзявалася, што падамся ў панядзелак, але не выйшла, — прызналася Ганна.
Не атрымалася аддаць дакументы і ў аўторак, 18 чэрвеня. У сераду — трэцяя спроба, на якую дзяўчына ўскладала вялікія надзеі.
Тэрмін разгляду дакументаў
Вольга з дачкой да 11.00 паспелі прастаяць у дзвюх чэргах: на выпадак, калі не паспеюць падацца ў «сшыткавую», узялі талон у «афіцыйнай».
— Знаёмыя прыйшлі падавацца раней за восьмую. Папрасілі іх заняць нам чаргу, а самі прыйшлі да дзевяці. Таму талон узялі за паўгадзіны. Думаю, тыя, хто пазней прыехаў, прастаяць даўжэй, — падзялілася сваімі назіраннямі Вольга.
Сярод планаў у мамы з дачкой — замежны адпачынак, таму займацца апастылем трэба менавіта цяпер.
У чарзе знайшліся і юрыдычныя асобы — прадстаўнікі бюро перакладаў. Па даверанасці яны падаюць на апастыль паперы сваіх кліентаў.
— [Чэргі] - гэта штогадовая сітуацыя, бо для падачы дакументаў ёсць абмежаванні па часе. Гатовыя легалізаваныя паперы трэба падаць у тэрмін, — расказала прадстаўніца бюро.
Паводле яе, легалізацыяй атэстатаў і дыпломаў звычайна займаюцца аж да пачатку жніўня.
Паводле афіцыйных звестак, тэрмін прастаўлення апастылю складае адзін дзень. Аднак некаторыя ўдзельнікі чата сцвярджалі, што атэстаты, пададзеныя юрасобамі, спецыялісты дэпартамента могуць разглядаць да 15 дзён.